Qeveria Franceze premton mbështetje në fushën e doganave (Publikuar dt. 29/03/2018)

Admirali Z.Patrick AUGER viziton Administratën Doganore Shqiptare.

Qeveria Franceze premton se do të vazhdojë të mbështesë përmirësimin e punës së Administratës Doganore Shqiptare. 

Drejtore e Përgjithshme e Doganave, zonja Belinda Ikonomi priti në një takim zyrtar Admiral  Z.Patrick AUGER, Zëvëndës Sekretari i Përgjithshëm i Sekretariatit të Detit, pranë kabinetit të Kryeministrit Francez. Gjatë këtij takimi bashkëbiseduesit ndanë mendimin se rritja e bashkëpunimit sidomos në shkëmbimin e informacioneve do të ndikojë shumë në sigurinë e dy vendeve tona. Zonja Ikonomi e informoi Admiralin mbi strukturën dhe objektivin e Doganës, e cila tashmë është përfshirë në operacione të ndryshme, jo vetëm në kontrollin e mallrave.

“Vëmendja tashmë është fokusuar shumë te siguria dhe shkëmbimi i informacionit mes vendeve tona, pikë kjo e rëndëshme edhe për Administratën Doganore”, theksoi zonja Ikonomi.

Shqipëria ka një pozicion strategjik në Mesdhe, tha Admirali Auger, duke vlerësuar punën e bërë nga Administrata Doganore Shqiptare. Ai u shpreh, se edhe pse nuk jeni ende vend anëtar i BE, ne do përpiqemi që t'u përfshijmë në shkëmbimet e informacionit , pasi po synohet të ngrihet një strukturë e veçantë  për Rojën Bregdetare Europiane, e cila do të  fokusohet në uljen e nivelit të emigracionit të paligjshëm dhe trafiqeve. Gjithashtu  Admirali premtoi mbështetje për Doganat Shqiptare në ngritjen e sistemeve të reja të kordinimit midis atij portual dhe doganor. Duke iu referuar përvojës së këtij sistemi në Marsejë, implementimi i këtij sistemi do të bënte të mundur që analiza e riskut për kontenierë  apo  mallra të ndryshëm  të bëhej ende pa hyrë në vend.

Gjatë vizitës së tij në vendin tonë, Admirali Auger vizitoi Qëndrën Ndërinstitucionale Operacionale Detare dhe Forcat Detare të Shqipërisë, ku u njoh nga afër me kapacitetet dhe funksionimin e këtyre strukturave, të cilave iu ofroi mbështetjen e tij.