Dogana Shqiptare, pjesë e Programit të Zhvillimit të Karrierës të Organizatës Botërore të Doganave

 Tiranë, 10 Tetor 2026 - Administrata Doganore Shqiptare është prej vitesh pjesë e Programit të Zhvillimit të Karrierës të Organizatës Botërore të Doganave, një iniciativë që synon forcimin e kapaciteteve profesionale, shkëmbimin e përvojave dhe zhvillimin e mëtejshëm profesional të punonjësve të administratave doganore.

Në këtë edicion, Administrata Doganore Shqiptare përfaqësohet nga Ada Lani, specialiste në Drejtorinë e Antitrafikut, e përzgjedhur mes pesë profesionistëve nga administratat doganore anëtare të OBD-së, të cilët do të angazhohen për 10 muaj pranë Sekretariatit të Organizatës në Bruksel.

Gjatë kësaj periudhe, pjesëmarrësit do të kenë mundësinë të bashkëpunojnë me ekspertë ndërkombëtarë, të njihen nga afër me proceset e punës së OBD-së dhe të zhvillojnë projekte konkrete modernizimi, të cilat do t'u prezantohen administratave përkatëse pas përfundimit të programit.

Sekretari i Përgjithshëm i Organizatës Botërore të Doganave, z. Ian Saunders, gjatë takimit me pjesëmarrësit e rinj, vlerësoi potencialin e tyre profesional dhe rëndësinë e këtyre programeve për zhvillimin e njohurive, aftësive dhe kontributit të tyre në komunitetin doganor ndërkombëtar.

Pjesëmarrja e vazhdueshme e Administratës Doganore Shqiptare në këtë program, prej disa vitesh tashmë, reflekton bashkëpunimin e qëndrueshëm me Organizatën Botërore të Doganave dhe angazhimin për zhvillimin profesional të punonjësve, në përputhje me praktikat më të mira ndërkombëtare.