Administrata Doganore dhe biznesi italian, dialog për lehtësimin e procedurave dhe integrimin europian

Tiranë, 07 Tetor 2026 - Administrata Doganore Shqiptare dhe Confindustria Albania zhvilluan sot Forumin Doganë–Biznes, me pjesëmarrjen e Drejtorit të Përgjithshëm të Doganave, z. Besmir Beja, drejtuesve të strukturave të Administratës Doganore, përfaqësuesve të Confindustria Albania dhe kompanive italiane e shqiptare që operojnë në vend.

Forumi u konceptua si një hapësirë dialogu të drejtpërdrejtë ndërmjet Administratës Doganore dhe biznesit, me fokus te lehtësimi dhe digjitalizimi i procedurave, implementimi i sistemeve të reja doganore, NCTS, Dritarja e Vetme Kombëtare, statusi i Operatorit Ekonomik të Autorizuar (AEO), si dhe procesi i përafrimit me legjislacionin dhe sistemet doganore të Bashkimit Europian.

Në fjalën e tij, Drejtori i Përgjithshëm i Doganave, z. Besmir Beja, theksoi se anëtarësimi në Bashkimin Europian dhe në Unionin Doganor përbën prioritetin kryesor strategjik të Administratës Doganore Shqiptare. Ai nënvizoi se puna është fokusuar në përafrimin e legjislacionit, zhvillimin e sistemeve IT në përputhje me ato të BE-së, forcimin e kapaciteteve administrative dhe përgatitjen operacionale për anëtarësim.

Drejtori Beja ftoi gjithashtu përfaqësuesit e biznesit të kontribuojnë në konsultimin publik për Kodin e ri Doganor, i cili synon procedura më të thjeshta, më shumë digjitalizim, rregulla më të qarta dhe një marrëdhënie më të parashikueshme ndërmjet biznesit dhe Administratës Doganore. Ai vlerësoi rolin e shoqatave të biznesit në këtë proces, duke theksuar se përshtatja me kërkesat e tregut të përbashkët europian kërkon angazhim të përbashkët të administratës dhe operatorëve ekonomikë.

Ndërsa zv/Presidenti i Confindustria Albania, z. Claudio Michelacci, vlerësoi rëndësinë e dialogut të drejtpërdrejtë ndërmjet komunitetit të biznesit dhe Administratës Doganore, si një mundësi për të adresuar çështjet operative që hasin kompanitë dhe për të identifikuar zgjidhje që lehtësojnë aktivitetin e tyre. Në këtë kuadër, u theksua rëndësia e vijimit të komunikimit dhe bashkëpunimit në procesin e digjitalizimit, thjeshtimit të procedurave dhe përafrimit me standardet europiane.

Gjatë diskutimit të hapur, përfaqësuesit e bizneseve dhe drejtuesit e Administratës Doganore shkëmbyen qëndrime mbi funksionimin dhe ndërlidhjen e sistemeve elektronike, kalimin drejt procedurave të reja digjitale, shkëmbimin e të dhënave ndërmjet institucioneve dhe nevojën për përgatitjen e operatorëve ekonomikë gjatë fazave të implementimit. Pjesë e diskutimeve ishin gjithashtu çështje specifike të lidhura me aktivitetin e operatorëve në sektorë të ndryshëm, për të cilat u evidentua rëndësia e trajtimit dhe bashkëpunimit teknik me strukturat përkatëse të Administratës Doganore.

Forumi konfirmoi rëndësinë e dialogut të vazhdueshëm Doganë–Biznes si pjesë e procesit të modernizimit të Administratës Doganore dhe përgatitjes së saj për integrimin në sistemin doganor të Bashkimit Europian, me synim krijimin e procedurave më të thjeshta, transparente dhe të parashikueshme për operatorët ekonomikë.