Administrata Doganore përgatitet për zbatimin e Sistemit të Plumbçeve Elektronike E-Seals

Tiranë, 26 Shtator 2026 – Në kuadër të përgatitjeve për zbatimin e Sistemit të Plumbçeve Elektronike E-Seals, Administrata Doganore Shqiptare, në bashkëpunim me ALBTrace Co. sh.a., zhvilloi një trajnim teknik dhe operacional për punonjësit që do të angazhohen në përdorimin dhe monitorimin e sistemit të ri.

Trajnimi u fokusua në njohjen me funksionimin e sistemit, përdorimin dhe vendosjen e pajisjeve elektronike, si dhe monitorimin e transportit përmes platformës përkatëse. Krahas pjesës teorike, programi përfshiu edhe demonstrimin praktik të vendosjes së pajisjeve në autocisternë dhe simulimin e një udhëtimi të monitoruar, nga nisja deri në përfundimin e tij, si pjesë e fazës përgatitore dhe testuese përpara përdorimit operacional të sistemit.  

E-Seals përbën një risi në mënyrën e kontrollit doganor të transporteve të karburanteve, duke kombinuar plumbosjen elektronike të pikave të aksesit të autocisternës me gjurmimin dhe monitorimin e mjetit gjatë lëvizjes. Përmes sistemit, informacioni mbi pozicionin e transportit, statusin e plumbçeve dhe ngjarjet e regjistruara gjatë udhëtimit transmetohet në një platformë qendrore, duke u mundësuar strukturave të autorizuara të Administratës Doganore monitorimin, kontrollin dhe vlerësimin e rasteve, me mbështetjen teknike të ALBTrace për funksionimin dhe administrimin e sistemit.

Ndryshe nga plumbosja tradicionale, sistemi elektronik krijon mundësinë që transporti të ndiqet përgjatë itinerarit, nga pika e nisjes deri në destinacion, duke rritur nivelin e kontrollit dhe gjurmueshmërisë. E-Seals mundëson gjithashtu evidentimin e ngjarjeve që kërkojnë verifikim, si ndërhyrjet në plumbçe, devijimet nga itinerari i përcaktuar, ndalesat e paautorizuara apo humbja e komunikimit.

Një tjetër element i rëndësishëm është ruajtja e historikut elektronik të transportit dhe e veprimeve të kryera në sistem, duke krijuar një evidencë të plotë nga momenti i vendosjes dhe aktivizimit të plumbçeve deri në mbërritjen në destinacion dhe përfundimin e transportit.

Futja e Sistemit E-Seals përfaqëson një tjetër hap në modernizimin dhe digjitalizimin e proceseve doganore, me synim forcimin e kontrollit, rritjen e sigurisë dhe përmirësimin e gjurmueshmërisë së transporteve të karburanteve nën mbikëqyrje doganore.