Administrata Doganore merr pjesë në trajnimin për forcimin e kapaciteteve në rikuperimin e aseteve

Tiranë, 16 Korrik 2026 - Përfaqësues të Administratës Doganore morën pjesë në trajnimin dyditor "Mbi Mjetet e Avancuara të Rikuperimit të Aseteve", organizuar në kuadër të projektit EU4LawEnforcement in Albania (EU4LEA), me pjesëmarrjen e institucioneve kryesore shqiptare të angazhuara në hetimet financiare, gjurmimin dhe rikuperimin e aseteve të përfituara nga veprimtaritë kriminale.

Trajnimi shërbeu si një platformë e rëndësishme për shkëmbimin e përvojave, dialogun institucional dhe forcimin e bashkëpunimit ndërinstitucional, duke mbledhur përfaqësues nga Zyra e Rikuperimit të Aseteve, SPAK, Agjencia e Inteligjencës Financiare, Policia e Shtetit, Drejtoria e Përgjithshme e Doganave, Drejtoria e Përgjithshme e Tatimeve dhe prokuroritë e juridiksionit të përgjithshëm.

Gjatë sesioneve të zhvilluara u trajtuan kuadri ligjor shqiptar dhe ai europian për rikuperimin e aseteve, mekanizmat e sekuestrimit dhe konfiskimit, bashkëpunimi ndërinstitucional në hetimet financiare, si dhe metodat e identifikimit dhe gjurmimit të pasurive të krijuara nga veprimtari të paligjshme. Vëmendje e veçantë iu kushtua rolit të Zyrës së Rikuperimit të Aseteve si një instrument operacional në mbështetje të hetimeve, bazuar në qasjen "Follow the Money", e cila synon identifikimin dhe konfiskimin e përfitimeve të paligjshme.

Për Administratën Doganore, pjesëmarrja në aktivitete të tilla përfaqëson një mundësi të rëndësishme për forcimin e kapaciteteve profesionale dhe të bashkëpunimit me institucionet ligjzbatuese, në funksion të luftës kundër krimit të organizuar, pastrimit të parave dhe formave të tjera të kriminalitetit financiar.

Administrata Doganore mbetet e angazhuar për të kontribuar në forcimin e koordinimit ndërinstitucional dhe zbatimin e praktikave më të mira evropiane, duke mbështetur një qasje të integruar dhe efektive në hetimet financiare dhe rikuperimin e aseteve me origjinë kriminale.