Administrata Doganore në takimin për Krimet Mjedisore në Bukuresht

Tiranë, 08.07.2026 - Përfaqësues të Administratës Doganore Shqiptare morën pjesë në takimin e Task Forcës për Krimet Mjedisore të SELEC, organizuar në kuadër të platformës EMPACT në Bukuresht, Rumani.

Takimi mblodhi së bashku përfaqësues të vendeve anëtare të SELEC, si edhe ekspertë nga organizata dhe institucione ndërkombëtare, me qëllim forcimin e bashkëpunimit rajonal dhe ndërkombëtar në luftën kundër krimeve mjedisore.

Gjatë dy ditëve të aktivitetit, delegacionet pjesëmarrëse prezantuan situatën në vendet e tyre lidhur me krimet mjedisore, kuadrin institucional dhe ligjor, tendencat, format më të zakonshme të veprimtarisë kriminale, si dhe raste konkrete të hetimit dhe goditjes së këtyre fenomeneve. Programi përfshinte gjithashtu prezantime nga partnerë ndërkombëtarë mbi praktikat më të mira, analizën e të dhënave, koordinimin ndërinstitucional dhe prioritetet e ardhshme në këtë fushë.

Në kuadër të sesionit kushtuar prezantimeve të vendeve pjesëmarrëse, Administrata Doganore Shqiptare prezantoi përvojën dhe angazhimin e saj në parandalimin dhe luftën kundër krimeve mjedisore, duke ndarë praktikat dhe bashkëpunimin ndërinstitucional për mbrojtjen e mjedisit dhe luftën kundër trafikimit të paligjshëm të specieve të mbrojtura, mbetjeve dhe produkteve të tjera që cenojnë mjedisin.

Pjesëmarrja në këtë aktivitet rikonfirmon angazhimin e Administratës Doganore Shqiptare për të forcuar bashkëpunimin me partnerët rajonalë dhe ndërkombëtarë, në funksion të rritjes së kapaciteteve dhe koordinimit në luftën kundër krimit mjedisor.