Dogana Shqiptare në takimin rajonal për operacionin “Balkan Eye-1”

Sarajevë, 26.06.2026 - Përfaqësues të Administratës Doganore Shqiptare morën pjesë në Takimin Rajonal të organizuar në Bosnje Hercegovinë, në kuadër të projektit të përbashkët të Bashkimit Europian dhe UNODC për forcimin e kontrollit kufitar dhe luftën kundër trafikut të paligjshëm në Europën Juglindore.

Takimi u zhvillua pas përfundimit të operacionit rajonal “Balkan Eye-1”, një aktivitet i koordinuar ndërmjet administratave doganore dhe agjencive ligjzbatuese të vendeve të rajonit, i cili synon forcimin e kontrolleve kufitare, shkëmbimin e informacionit operacional dhe identifikimin e rasteve të trafikimit dhe shkeljeve doganore.

Gjatë operacionit, vendet pjesëmarrëse bashkëpunuan ngushtë përmes shkëmbimit të të dhënave, sinjalizimeve operative dhe analizave të riskut, duke mundësuar kryerjen e kontrolleve të koordinuara në pika të ndryshme kufitare. Takimi në Sarajevë shërbeu për prezantimin e rezultateve të operacionit, ndarjen e praktikave më të mira dhe diskutimin e mekanizmave për forcimin e mëtejshëm të bashkëpunimit rajonal.

Operacioni rajonal “Balkan Eye-1” u finalizua me 19 raste sekuestrimesh dhe ndërhyrjesh ligjzbatuese, me një vlerë totale të vlerësuar mbi 72,745 euro. Rezultatet e operacionit evidentuan shkelje që lidhen me kontrabandën e valutës, kontrabandën e arit, trafikimin e lëndëve narkotike, përdorimin e dokumenteve të falsifikuara të udhëtimit, kontrabandën e mallrave luksoze, mallrat e padeklaruara dhe kundërvajtje të tjera doganore.

Një pjesë e rëndësishme e diskutimeve iu kushtua edhe kërcënimit në rritje që paraqesin opioidet sintetike, përfshirë Fentanyl-in dhe drogat e reja sintetike, si dhe nevojës për rritjen e koordinimit ndërmjet administratave doganore, policive kufitare dhe partnerëve ndërkombëtarë për identifikimin dhe goditjen e këtyre fenomeneve.

Pjesëmarrja e Doganës Shqiptare në këtë aktivitet konfirmon angazhimin e institucionit për forcimin e bashkëpunimit rajonal dhe ndërkombëtar, shkëmbimin e informacionit operacional dhe rritjen e efektivitetit të kontrolleve doganore në luftën kundër kontrabandës, trafikimit të paligjshëm dhe formave të tjera të krimit ndërkufitar.