Dogana Shqiptare, institucioni më i vlerësuar nga biznesi në Indeksin e Biznesit nga Dhoma Amerikane e Tregtisë

Sipas Indeksit të Biznesit 2025–2026 të publikuar nga Dhoma Amerikane e Tregtisë në Shqipëri (AmCham), Dogana Shqiptare rezulton institucioni publik me vlerësimin më pozitiv nga komuniteti i biznesit. Dogana Shqiptare ka marrë 58.66 pikë, duke u renditur ndër institucionet me rezultatin më të lartë.

Ky vlerësim përfaqëson perceptimin e biznesit mbi marrëdhënien me Administratën Doganore dhe pasqyron angazhimin e vazhdueshëm të Doganës Shqiptare për të ofruar shërbime më efikase, transparente dhe të orientuara drejt nevojave të operatorëve ekonomikë.

Rezultati pozitiv vjen si reflektim i reformave të ndërmarra për modernizimin e procedurave doganore, zgjerimin e shërbimeve digjitale, lehtësimin e tregtisë dhe forcimin e bashkëpunimit me komunitetin e biznesit.

Dogana Shqiptare mbetet e angazhuar për të vijuar procesin e transformimit institucional, duke ndërtuar një administratë moderne, të besueshme dhe në përputhje me standardet më të mira evropiane, në mbështetje të zhvillimit ekonomik dhe konkurrueshmërisë së biznesit.