Zhvillohet Forumi Biznes - Dogana me Dhomën Amerikane të Tregtisë

Tiranë, 17.06.2026 - Drejtoria e Përgjithshme e Doganave, në bashkëpunim me Dhomën Amerikane të Tregtisë, zhvilloi sot Forumin Biznes–Dogana, një platformë e qëndrueshme dialogu mes administratës doganore dhe komunitetit të biznesit për të adresuar çështjet aktuale dhe për të forcuar bashkëpunimin.

 
Drejtori i Përgjithshëm i Drejtorisë së Doganave, Besmir Beja, prezantoi vizionin strategjik të Administratës Doganore në funksion të integrimit europian, duke theksuar rëndësinë e përafrimit të plotë të legjislacionit doganor me “acquis communautaire” dhe avancimin e transformimit digjital të shërbimeve. Ai nënvizoi se modernizimi i sistemeve të teknologjisë së informacionit dhe ndërveprimi me sistemet e Bashkimit Europian janë shtylla kryesore për një administratë më efikase, të bazuar në të dhëna dhe menaxhim risku.

 
Drejtori Ekzekutiv i Dhomës Amerikane të Tregtisë, Neritan Mullaj, vlerësoi dialogun e strukturuar me Administratën Doganore dhe theksoi rëndësinë e këtij forumi si një instrument praktik për adresimin e çështjeve që ndikojnë në aktivitetin e biznesit. Ai nënvizoi nevojën për vijimësi në komunikim dhe përmirësim të mëtejshëm të procedurave, në funksion të një klime më të qëndrueshme dhe konkurruese për investimet.

Kryetarja e Komitetit të Taksave dhe Doganave të AmCham, Alketa Uruçi, prezantoi çështjet kryesore të adresuara gjatë vitit 2026, duke theksuar rëndësinë e trajtimit të tyre në mënyrë të strukturuar dhe të qëndrueshme për të garantuar stabilitet për biznesin.

Përfaqësuesit e komunitetit të biznesit vlerësuan punën e Administratës Doganore në drejtim të digjitalizimit të shërbimeve, reduktimit të kohës së procedurave, rritjes së transparencës dhe përmirësimit të komunikimit institucional, duke e konsideruar këtë bashkëpunim si një faktor të rëndësishëm për lehtësimin e tregtisë dhe rritjen e parashikueshmërisë ekonomike.

Gjatë diskutimeve u trajtua gjithashtu progresi në implementimin e Sistemit të Transitit të Përbashkët me BE-në (NCTS), i cili përfaqëson një hap të rëndësishëm drejt modernizimit të procedurave të transitit, rritjes së transparencës dhe lehtësimit të tregtisë.

Administrata Doganore ftoi bizneset anëtare të AmCHam të aplikojnë për marrjen e statusit të Operatorit Ekonomik të Autorizuar (AEO), si një instrument që rrit besueshmërinë, ofron lehtësi doganore dhe krijon avantazhe konkrete për operatorët ekonomikë në tregtinë ndërkombëtare.