Vijojnë trajnimet për implementimin e Sistemit të Transitit të Përbashkët (NCTS) me BE-në

Tiranë, 15.06.2026 - Në kuadër të zbatimit të projektit për implementimin e Sistemit të Transitit të Përbashkët me BE-në (NCTS – New Computerised Transit System), po zhvillohen trajnime të dedikuara me përdoruesit e sistemit. Në këto aktivitete po marrin pjesë përfaqësues të kompanisë përgjegjëse për zhvillimin e sistemit, anëtarët e grupit të punës, Njësia e Implementimit të Projektit (PIU), si dhe eksperti ndërkombëtar i angazhuar në kuadër të projektit.

Trajnimet fokusohen në prezantimin dhe përdorimin praktik të moduleve të sistemit NCTS, me qëllim njohjen e përdoruesve me funksionalitetet e reja, diskutimin e çështjeve teknike dhe procedurale, si dhe koordinimin e veprimeve të nevojshme për implementimin e suksesshëm të sistemit.

NCTS përfaqëson një nga modernizimet më të rëndësishme në fushën e transitit doganor, duke mundësuar shkëmbimin elektronik të të dhënave në kohë reale ndërmjet administratave doganore europiane dhe operatorëve ekonomikë. Sistemi sjell përmirësime të ndjeshme në efikasitetin e procedurave të transitit, uljen e dokumentacionit në letër, rritjen e transparencës dhe gjurmueshmërisë së lëvizjes së mallrave, si dhe përshpejtimin e përpunimit të deklaratave të transitit.

Një nga risitë kryesore të NCTS është automatizimi i proceseve të komunikimit dhe menaxhimit të tranzitit përmes mesazheve elektronike të standardizuara, duke reduktuar ndërhyrjet manuale dhe duke rritur sigurinë e të dhënave. Gjithashtu, sistemi krijon mundësi më të mëdha për menaxhimin e riskut dhe monitorimin efektiv të operacioneve të transitit në përputhje me standardet europiane.

Zhvillimi i këtyre trajnimeve përbën një hap të rëndësishëm drejt përgatitjes së administratës doganore dhe komunitetit të biznesit për përdorimin e plotë të sistemit, duke siguruar një tranzicion të suksesshëm drejt procedurave moderne dhe të digjitalizuara të transitit. Implementimi i NCTS-së ka një rëndësi të veçantë edhe në kuadër të procesit të integrimit evropian, pasi përbën një nga kërkesat kryesore për aderimin në Konventën e Transitit të Përbashkët dhe harmonizimin e procedurave doganore me standardet e Bashkimit Europian. Funksionalizimi i këtij sistemi do të lehtësojë lëvizjen ndërkombëtare të mallrave, do të forcojë bashkëpunimin me administratat doganore të vendeve partnere dhe do të afrojë më tej Shqipërinë me praktikat dhe mekanizmat e tregut të përbashkët europian.