Drejtori i Përgjithshëm i Doganave në konferencën e nivelit të lartë BE–Ballkani Perëndimor në Athinë

Athinë, 11 qershor 2026 – Drejtori i Përgjithshëm i Doganave, Besmir Beja, mori pjesë në Konferencën e Tretë të Drejtorëve të Përgjithshëm të Doganave të Ballkanit Perëndimor dhe shteteve anëtare të Bashkimit Europian, e zhvilluar në Athinë, Greqi.

Konferenca, me temë “Lidhja e Tregjeve, Harmonizimi i Standardeve: Korsitë e Gjelbra si shtyllë e integrimit të përforcuar në Tregun e Vetëm të BE-së”, mblodhi drejtues të administratave doganore nga vendet e CEFTA-s dhe shtetet anëtare të BE-së, përfaqësues të Komisionit Europian, komunitetit të biznesit dhe organizatave rajonale e ndërkombëtare.

Aktiviteti u organizua nga Sekretariati i CEFTA-s nëpërmjet veprimit SEED+, në bashkëpunim me Autoritetin e Pavarur të të Ardhurave Publike të Republikës së Greqisë dhe Sekretariatin e Komunitetit të Transportit, duke shërbyer si një platformë e rëndësishme për avancimin e bashkëpunimit doganor dhe mbështetjen e integrimit gradual të vendeve të rajonit në Tregun e Vetëm Europian.

Diskutimet u fokusuan në zgjerimin e konceptit të Korsive të Gjelbra, forcimin e ndërveprueshmërisë së sistemeve doganore, zhvillimin e mjeteve digjitale dhe harmonizimin e praktikave operacionale, me qëllim krijimin e flukseve tregtare më të sigurta, më efikase dhe më të parashikueshme ndërmjet vendeve të CEFTA-s dhe Bashkimit Europian.

Gjatë panelit të dytë, kushtuar rolit strategjik të administratave doganore në procesin e integrimit europian, Drejtori i Përgjithshëm i Doganave ndau përvojën e Shqipërisë në modernizimin e procedurave doganore, lehtësimin e tregtisë dhe forcimin e bashkëpunimit rajonal. Në diskutim u theksua se bashkëpunimi doganor nuk përfaqëson më vetëm një instrument për lehtësimin e tregtisë, por një mekanizëm të rëndësishëm për integrimin ekonomik dhe afrimin me standardet e Bashkimit Europian.

Në këtë kuadër, z. Beja vuri në dukje se modernizimi i proceseve doganore, shkëmbimi i informacionit dhe koordinimi ndërmjet administratave mbeten elementë thelbësorë për krijimin e një tregtie më të shpejtë, më të sigurt dhe më të parashikueshme. Ai theksoi gjithashtu se nisma e Korsive të Gjelbra përfaqëson një hap konkret drejt afrimit të vendeve të Ballkanit Perëndimor me standardet dhe praktikat e Bashkimit Europian.

Pjesëmarrësit diskutuan gjithashtu forcimin e bashkëpunimit ndërmjet administratave doganore të vendeve të CEFTA-s dhe Bashkimit Europian përmes sistemeve të ndërveprueshme, menaxhimit të koordinuar të riskut, programeve të Operatorëve Ekonomikë të Autorizuar (AEO) dhe përafrimit me reformën e re të Kodit Doganor të Unionit. Një vëmendje e veçantë iu kushtua rolit të shkëmbimit elektronik të të dhënave përmes platformës SEED+, si një mjet kyç për rritjen e transparencës, përshpejtimin e procedurave kufitare dhe forcimin e bashkëpunimit ndërmjet administratave.

Në përfundim të konferencës u prezantua deklarata përfundimtare, e cila përmblodhi prioritetet dhe angazhimet e përbashkëta të dakordësuara gjatë diskutimeve. Pjesëmarrësit riafirmuan rëndësinë e bashkëpunimit doganor si një shtysë konkrete për integrimin europian, me fokus në digjitalizimin, ndërveprueshmërinë e sistemeve, menaxhimin e koordinuar të riskut, partneritetet me operatorët ekonomikë dhe vijimin e zbatimit të Korsive të Gjelbra dhe Blu të mbështetura nga SEED+. Gjithashtu, u theksua nevoja për të kaluar nga angazhimet politike drejt zbatimit konkret të masave që forcojnë lidhjen ekonomike dhe tregtare ndërmjet vendeve të rajonit dhe Bashkimit Europian.

Konferenca e këtij viti pason edicionin e dytë të zhvilluar në Tiranë në qershor 2025, organizuar nga Dogana Shqiptare, i cili mblodhi drejtuesit e administratave doganore të Ballkanit Perëndimor dhe të shteteve anëtare të Bashkimit Europian për të diskutuar prioritetet e përbashkëta në fushën doganore dhe integrimin europian.