Vendim i Bordit të Transparencës, datë 23 Maj 2026  

Tiranë, 23 maj 2026 – Bordi i Transparencës dhe Kufizimit të Përkohshëm të çmimeve të tregtimit me shumicë/pakicë të nënprodukteve të naftës dhe të gazit ka miratuar Vendimin nr. 26, datë 23.05.2026, për përcaktimin e çmimeve tavan të tregtimit në tregun vendas të benzinës dhe gazoilit.

Vendimi është marrë në mbështetje të Vendimit të Këshillit të Ministrave nr. 186, datë 19.03.2026 “Për shpalljen e situatës së veçantë në tregun e hidrokarbureve”, si dhe në zbatim të ligjit nr. 8450, datë 24.02.1999 “Për përpunimin, transportimin dhe tregtimin e naftës, të gazit dhe nënprodukteve të tyre”, të ndryshuar, dhe Aktit Normativ nr. 1, datë 03.04.2026.

 
Sipas vendimit të miratuar, çmimet tavan të tregtimit janë:

 
Çmimet tavan për shitjen me shumicë:

• 183 lekë/litër për gazoilin

• 170 lekë/litër për benzinën

Çmimet tavan për shitjen me pakicë:

• 195 lekë/litër për gazoilin

• 182 lekë/litër për benzinën

 
Vlera “Premio” zbatohet sipas publikimit të Drejtorisë së Përgjithshme të Doganave të një dite më parë. Çmimet e miratuara reflektojnë kuotimet ndërkombëtare të bursës, të publikuara nga agjencia “S&P Global Platts” në USD, në kushtet e lëvrimit FOB Med, si dhe detyrimet doganore dhe tatimore në fuqi, përfshirë marzhet bruto maksimale të tregtimit dhe TVSH-në.

Bazuar në zbatimin e metodologjisë së përcaktuar në ligjin nr. 8450/1999, çmimet e miratuara janë nën kufirin e përcaktuar në Aktin Normativ nr. 1, datë 03.04.2026, dhe për rrjedhojë niveli i akcizës do të zbatohet i plotë, në masën 100%.

Vendimi hyn në fuqi më datë 23.05.2026, ora 13:20 dhe është i detyrueshëm për të gjitha shoqëritë që tregtojnë me shumicë dhe pakicë nënproduktet e naftës dhe gazit.