Drejtoria e Përgjithshme e Doganave merr pjesë në takimin rajonal të CEFTA-s për tregtinë elektronike dhe procedurat doganore

Tiranë, 17.05.2026 – Ekspertë të tregtisë elektronike dhe procedurave doganore nga të 7 Palët e CEFTA-s u mblodhën këtë javë në Shkup, në kuadër të projektit EU4Trade, të mbështetur nga Bashkimi Europian dhe Gjermania, me qëllim përmirësimin e procedurave të tregtisë online në rajonin e Ballkanit Perëndimor.

Takimi rajonal, i organizuar në bashkëpunim me Sekretariatin e CEFTA-s, u fokusua në identifikimin e zgjidhjeve praktike për përshpejtimin e procedurave doganore, rritjen e cilësisë dhe shkëmbimit të të dhënave digjitale, forcimin e bashkëpunimit ndërmjet administratave doganore, si dhe përafrimin me reformat e ardhshme të Bashkimit Europian në fushën doganore dhe të TVSH-së.

Gjatë aktivitetit, pjesëmarrësit prezantuan praktikat dhe eksperiencat e vendeve të tyre, si edhe shkëmbyen njohuri mbi procesin e përafrimit me sistemet doganore të BE-së.

Këto shkëmbime kontribuojnë në ndërtimin e sistemeve doganore më efikase, moderne dhe të besueshme në rajon, duke lehtësuar tregtinë elektronike, përmirësuar shërbimet për qytetarët dhe mbështetur bizneset në aksesin më të lehtë drejt tregjeve rajonale dhe atyre të Bashkimit Europian.