Bashkëpunim për modernizimin e administratës doganore dhe lehtësimin e tregtisë

Bashkëpunim për modernizimin e administratës doganore dhe lehtësimin e tregtisë

Tiranë, 16.04.2026 - Drejtori i Përgjithshëm i Doganave, z. Besmir Beja, zhvilloi një takim me drejtuesen e projektit RegioTrade, znj. Tanja Boskoviç, në kuadër të forcimit të bashkëpunimit dhe mbështetjes për Administratën Doganore Shqiptare. Në takim morën pjesë gjithashtu znj. Sonja Kurz, Drejtore e Zyrës së GIZ në Shqipëri, si dhe znj. Eranda Begaj, Koordinatore e vendit për Fondin Rajonal të Hapur për Tregtinë e Jashtme dhe Menaxhere Projekti në Zyrën e Tiranës.

RegioTrade dhe EU4Trade janë projekte të financuara nga Ministria Federale Gjermane për Bashkëpunim Ekonomik dhe Zhvillim (BMZ) dhe të bashkëfinancuara nga Bashkimi Europian, që mbështesin reformat tregtare dhe integrimin ekonomik rajonal në përputhje me standardet e BE-së.

Qëllimi i takimit ishte prezantimi dhe koordinimi i mëtejshëm i nismave në mbështetje të Administratës Doganore Shqiptare, si dhe diskutimi mbi prioritetet aktuale dhe forcimi i bashkëpunimit me projektet RegioTrade dhe GIZ.

U vlerësua gjithashtu bashkëpunimi i deritanishëm me GIZ, i cili ka kontribuar në modernizimin e proceseve doganore, forcimin e menaxhimit të riskut, zgjerimin e programeve të Operatorit Ekonomik të Autorizuar (AEO) dhe zhvillimin e shërbimeve dixhitale për bizneset.

Ky bashkëpunim ka ndikuar në përmirësimin e efikasitetit operacional dhe në përafrimin e mëtejshëm me standardet e Bashkimit Europian, përmes mbështetjes në fusha si procedurat elektronike, kontrolli i bazuar në risk dhe thjeshtimi i procedurave doganore.

Programi RegioTrade synon të vijojë mbështetjen për modernizimin e procedurave kufitare, forcimin e bashkëpunimit ndërinstitucional dhe lehtësimin e tregtisë në rajon.

Takimi riafirmoi angazhimin e përbashkët për vijimin e reformave dhe forcimin e bashkëpunimit në funksion të një administrate doganore moderne, efikase dhe të përafruar me standardet e BE-së.