Takim bilateral Shqipëri–Mal i Zi për forcimin e bashkëpunimit doganor dhe avancimin e integrimit europian

 Tiranë, 27.03.2026 - Drejtori i Përgjithshëm i Doganave, z. Besmir Beja, zhvilloi vizitën e tij të parë zyrtare bilaterale në Mal të Zi, ku u prit nga Drejtoresha e Përgjithshme e Doganave të Malit të Zi, znj. Maja Vuçiniç.

 
Takimi, i zhvilluar në Podgoricë, konfirmoi marrëdhëniet e mira të bashkëpunimit ndërmjet dy administratave doganore dhe vullnetin për ta thelluar më tej atë në funksion të integrimit evropian.

Gjatë takimit u diskutua mbi rritjen e shkëmbimeve tregtare dhe lehtësimin e procedurave doganore për biznesin, si dhe mbi forcimin e bashkëpunimit në kuadër të nismave rajonale, përfshirë CEFTA dhe projektet për shkëmbimin elektronik të të dhënave.

 
Në fjalën e tij, z. Beja theksoi: “Bashkëpunimi mes administratave tona doganore është kyç për përmbushjen e standardeve të Bashkimit Evropian dhe për lehtësimin e tregtisë, duke garantuar njëkohësisht sigurinë dhe luftën ndaj kontrabandës.”

 
Palët vlerësuan pozitivisht bashkëpunimin ekzistues, duke nënvizuar nevojën për intensifikimin e mëtejshëm të tij përmes rritjes së operacioneve të përbashkëta, shkëmbimit në kohë reale të informacionit dhe zhvillimit të kapaciteteve.

 
Kjo vizitë shënon një hap të rëndësishëm në forcimin e marrëdhënieve dypalëshe dhe në avancimin e përpjekjeve të përbashkëta drejt integrimit evropian.