Vijon bashkëpunimi mes Doganës Shqiptare dhe asaj Italiane 

Përfaqësues të Administratës Doganore Shqiptare morën pjesë në një vizitë studimore të organizuar nga Agjencia Italiane e Doganave dhe Monopoleve, në kuadër të instrumentit TAIEX të Komisioni Evropian. Aktiviteti u zhvillua me fokus deklarimin e parasë (cash) dhe kontrollet në kufi, si pjesë e procesit të përafrimit të legjislacionit dhe procedurave të Administratës Doganore Shqiptare me standardet e Bashkimit Evropian.

Qëllimi i kësaj vizite ishte mbështetja e Administratës Doganore Shqiptare në përgatitjen dhe zbatimin e sistemit të deklarimit të parasë sipas legjislacionit të Bashkimit Evropian. Një pjesë e rëndësishme e diskutimeve iu kushtua edhe aspekteve teknike të shkëmbimit të të dhënave dhe strukturave të informacionit, përfshirë kërkesat për shkëmbimin e informacionit në nivel evropian përmes sistemeve të dedikuara të Bashkimit Evropian, si dhe procedurave për menaxhimin e deklarimeve të parasë dhe verifikimin e saktësisë së të dhënave.

Programi përfshiu gjithashtu studime rastesh dhe operacione të përbashkëta doganore që lidhen me deklarimet e parasë, duke ofruar shembuj praktikë mbi identifikimin e riskut dhe procedurat e kontrollit. Pjesëmarrësit u njohën gjithashtu me praktikat e kontrollit të deklarimeve të parasë në aeroport, ku u prezantua kuadri rregullator dhe masat administrative që aplikohen në rast shkeljesh.

Kjo vizitë studimore kontribuon në forcimin e kapaciteteve profesionale të Administratës Doganore Shqiptare, duke mbështetur harmonizimin e procedurave me standardet e Bashkimit Evropian dhe duke rritur efektivitetin e kontrolleve për parandalimin e lëvizjeve të padeklaruara të parasë dhe aktiviteteve të paligjshme financiare.

Përmes aktiviteteve të tilla, Administrata Doganore Shqiptare vijon të thellojë bashkëpunimin me partnerët ndërkombëtarë dhe institucionet evropiane, duke promovuar shkëmbimin e përvojave dhe praktikave më të mira në fushën doganore.