Drejtori i Përgjithshëm i Doganave pret Drejtuesen e Sekretariatit të CEFTA-s, në fokus Presidenca e Shqipërisë e CEFTA dhe bashkëpunimi në fushën e doganave

Drejtori i Përgjithshëm i Doganave, z. Besmir Beja, priti në një takim Drejtoren e Sekretariatit të CEFTA-s, (Marrëveshja e Tregtisë së Lirë të Evropës Qendrore), znj. Pranvera Kastrati, ku në qendër të diskutimit ishte roli i Shqipërisë në kuadër të Presidencës së CEFTA-s për vitin 2026 dhe prioritetet në fushën e bashkëpunimit doganor.

Gjatë bisedës, Drejtori Beja vlerësoi rolin e CEFTA-n si një mekanizëm thelbësor për forcimin e stabilitetit ekonomik dhe sigurisë tregtare në rajon, si dhe si një platformë konkrete për afrimin e vendeve anëtare me tregun e përbashkët europian.

Drejtori i Përgjithshëm theksoi se për Administratën Doganore Shqiptare, bashkëpunimi rajonal nuk është thjesht një angazhim formal, por një instrument praktik për të rritur transparencën, për të garantuar procedura më të shpejta dhe për t’u ofruar bizneseve një mjedis më të parashikueshëm.

Znj. Kastrati vlerësoi faktin se drejtimi nga Shqipëria gjatë vitit 2025 i Nënkomitetin për Doganat dhe Rregullat e Origjinës, ishte një histori suksesi mbështetur në procese të rëndësishme teknike dhe vendimmarrëse si, krijimi i Organit Këshillimor të CEFTA-s për Bashkëpunimin Doganor në fushën e klasifikimit tarifor dhe rregullave të origjinës, forcimi i mekanizmave të përbashkët të menaxhimit të riskut, zhvillimi i mëtejshëm i programit të Operatorëve Ekonomik të Autorizuar (AEO), zhvillimi i tregtisë elektronike në vendet të CEFTA-s etj..

Sipas Znj.Kastrati, thellimi i koordinimit në fushën e menaxhimit të riskut, shkëmbimit elektronik të të dhënave dhe zbatimit të rregullave të përbashkëta të origjinës është thelbësor për të garantuar siguri dhe lehtësim të njëkohshëm të tregtisë në të gjithë rajonin.

Takimi riafirmoi angazhimin e përbashkët për të vijuar me hapa konkretë drejt një bashkëpunimi edhe më të strukturuar, duke e shndërruar Presidencën e Shqipërisë në CEFTA një mundësi për të konsoliduar arritjet e deritanishme dhe për të çuar përpara procese që ndikojnë drejtpërdrejt në përmirësimin e klimës së biznesit dhe në avancimin e integrimit ekonomik rajonal dhe europian.