Drejtoria e Përgjithshme e Doganave tërheq vëmendjen mbi zbatimin e regjimit të Magazinimit Doganor (18/02/2026)

Drejtoria e Përgjithshme e Doganave, nisur nga shqetësimet e ngritura nga strukturat e kontrollit dhe mbikëqyrjes, lidhur me zbatimin e procedurave që mundësojnë vendosjen/hyrjen e mallrave nën regjimin e posaçëm të Magazinimit Doganor, mbikqyrjen e tyre dhe përmbylljen e regjimit (daljen e mallrave), ka kërkuar nga degët doganore dhe operatorët ekonomikë zbatimin në mënyrë sa më rigoroze të akteve ligjore e nënligjore që rregullojnë këtë proces.

Drejtoria e Përgjithshme e Doganave, me qëllim eliminimin e rasteve të neglizhencës në zbatimin me korrektësi të rregullave që mundësojnë mbikëqyrjen e mallrave nën regjimin e Magazinimit Doganor, sjell në vëmendjen e operatorëve ekonomikë detyrimet e mëposhtme: 

• Dërgimi i mallrave në rrugë të drejtpërdrejtë, menjëherë pas pranimit të deklaratës doganore (IM7) dhe vetëm në ambjentet e miratura për Magazinim Doganor. Depozitimi i deklaratës doganore mund të kryhet vetëm në zyrat doganore të miratuara për vendosjen e mallrave nën regjim;
• Magazinimi i mallrave joshqiptare (kryesisht në Magazinat Doganore Publike) duhet t’i përgjigjet nevojës reale të argumentuar për përdorimin e regjimit dhe në asnjë rast për efekt të shmangies nga rregulli i kompetencës territorial;
• Përshkrimi i saktë dhe klasifikimi tarifor i mallrave të deklaruara për hyrjen nën regjim;
• Sistemimi i mallrave që të mundësojë qartësisht dhe lehtësisht verifikimin e tyre në ambjentet e magazinimit. Në rastet e magazinimit të dy kategorive të përbashkëta (mallra shqiptare dhe joshqiptare) duhet të mundësohet ndarja e tyre dhe evidentimi në regjistra të veçantë për secilën kategori;
• Dorëzimi i listës së mallrave të magazinuara (listës së stoqeve) çdo datë 5 të muajit pasardhës pranë Degës Doganore mbikëqyrëse;
• Për mallrat me afat skadimi (kryesisht ato ushqimore) depozitimi i deklaratës doganore për daljen nga regjimi duhet të kryhet të paktën 3 muaj përpara afatit të skadimit;
• Në asnjë rast, dalja e mallrave nga ambjetet e miratuara të Magazinimit Doganor nuk duhet të kryhet pa u depozituar dhe pranuar, fillimisht, deklarata doganore për vendosjen e tyre në regjimin pasues;
• Zbatimi i standardeve që duhet të plotësojnë ambjentet e magazinimit dhe që mundësojnë ruajtjen dhe sigurinë e mallrave në gjëndje të pandryshuar (si mbrojtja kunër zjarrit, cilësia e ndërtimit, lagështia, funksionimi i kamerave, mbyllja dhe ruajtja e ambjenteve, etj).

Drejtoria e Përgjithshme e Doganave shpreh bindjen se, zbatimi i ligjshmërisë dhe bashkëpunimi me operatorët ekonomikë do të garantojnë mbrojtjen e interesave ekonomikë dhe financiarë të vendit.