Dogana Shqiptare me vlerësim pozitiv nga Indeksi i Biznesit i Dhomës Amerikane të Tregtisë (Publikuar dt. 02/08/2025)

Administrata Doganore është renditur ndër institucionet me vlerësim pozitiv nga Indeksi i Biznesit 2025, i publikuar së fundmi nga Dhoma Amerikane e Tregtisë në Shqipëri (AmCham). Ky indeks mat perceptimin e komunitetit të biznesit mbi klimën ekonomike në vend dhe efektivitetin e institucioneve publike në mbështetje të sipërmarrjes.

 
Në këtë vlerësim, Dogana Shqiptare evidentohet për përmirësimet në transparencë, profesionalizëm dhe përpjekjet për të lehtësuar proceset për biznesin, veçanërisht në raport me thjeshtimin e procedurave, dixhitalizimin e shërbimeve dhe rritjen e bashkëpunimit me sektorin privat.

 
Ky rezultat pasqyron qartësisht orientimin e administratës doganore drejt një modeli modern dhe efikas, që vendos në qendër shërbimin ndaj qytetarëve dhe bizneseve. Për Doganën Shqiptare, ky vlerësim shërben si një nxitje e mëtejshme për të vijuar reformat dhe për të thelluar partneritetin me sipërmarrjen, në funksion të zhvillimit ekonomik të vendit dhe rritjes së besimit tek institucionet publike.

Administrata Doganore mbetet e angazhuar për të përmirësuar vazhdimisht performancën e saj dhe për të ndërtuar një sistem doganor bashkëkohor, të besueshëm dhe të orientuar drejt standardeve më të mira ndërkombëtare.