CEFTA publikon konkluzionet e takimit të 29-të të Nënkomitetit për Doganat dhe Rregullat e Origjinës (Publikuar dt. 27/06/2025)

Në 11 Qershor Tirana mirëpriti takimin e radhës të Nënkomitetit të CEFTA-s për Doganat dhe Rregullat e Origjinës, ku përfaqësues të vendeve anëtare diskutuan mbi progresin e arritur në kuadër të prioriteteve të Presidencës së Shqipërisë për vitin 2025 në fushën e bashkëpunimit doganor.

Në qendër të diskutimeve ishin përparimet në menaxhimin e riskut, zbatimi i statusit të Operatorëve Ekonomikë të Autorizuar (AEO), si dhe rregullat e origjinës, në funksion të rritjes së transparencës dhe lehtësimit të tregtisë brenda CEFTA-s.

CEFTA publikoi ditën e sotme konkluzionet e takimit ndër të cilat: 

• U miratuan Termat e Referencës për krijimin e Trupës Këshillimore për Bashkëpunim Doganor në fushën e Klasifikimit Tarifor dhe Rregullave të Origjinës, si dhe të Grupit të Punës për Operatorët Ekonomikë të Autorizuar (AEO);

• U finalizua Strategjia për Menaxhimin e Riskut Doganor 2025–2028, bashkë me Planin e Zbatimit dhe Planin e Veprimit përkatës.

Ndër zhvillimet më të rëndësishme të evidentuara gjatë këtij takimi ishin: 

• Zgjerimi i procesit të digjitalizimit përmes platformës SEED+;

• Nisja e projektit pilot për sistemin elektronik për menaxhimin e riskut doganor;

• Përparimi në modernizimin e “Korridoreve të Gjelbërta” me vendet anëtare të BE-së;

• Forcimi i bashkëpunimit me Bashkimin Europian në kuadër të Konventës së Rishikuar PEM.