Bashkëpunim i ngushtë Shqipëri – Turqi në fushën doganore (Publikuar dt. 25/06/2025)

Një delegacion i nivelit të lartë nga Dogana e Turqisë u prit nga drejtuesit e Administratës Doganore Shqiptare në Tiranë, pas takimit të suksesshëm të zhvilluar në Shkurt të këtij viti mes delegacioneve të drejtuesve të administratave doganore në Ankara.

Gjatë takimit në zyrat e Drejtorisë së Përgjithshme të Doganës Shqiptare përfaqësuesit e dy delegacioneve diskutuan mbi strategjitë e përbashkëta për të luftuar kontrabandën dhe trafikun e paligjshëm, në mënyrë të veçantë për të forcuar bashkëpunimin profesional dhe partneritetin ndërinstitucional në fushën e hetimeve doganore.

Palët ndanë bindjen se, shkëmbimi i praktikave më të mira dhe i informacioneve operative është thelbësor për forcimin e kapaciteteve hetimore dhe për kryerjen e operacioneve të përbashkëta kundër krimeve doganore.

Ky bashkëpunim është pjesë e përpjekjeve të vazhdueshme për të rritur efektivitetin e operacioneve doganore dhe për të siguruar një shkëmbim të shpejtë dhe efikas të informacionit midis dy vendeve.

Turqia mbetet një partner strategjik për Shqipërinë në shumë fusha, përfshirë edhe atë doganore. Mbështetja dhe asistenca e ndërsjellë në hetime, trajnime dhe zhvillimin e kapaciteteve operacionale, përbëjnë një aspekt thelbësor të bashkëpunimit ndërmjet strukturave doganore të dy vendeve.