Reduktohet ndjeshëm përdorimi i produkteve të padeklaruara të duhanit në Shqipëri

Një studim i realizuar nga Development Solutions Associates (DSA), në bashkëpunim me Economics for Health në Johns Hopkins University (JHU), tregon se përdorimi i produkteve të padeklaruara të duhanit në Shqipëri është reduktuar ndjeshëm vitet e fundit. Sipas të dhënave, vetëm 1.5% e duhanpirësve deklarojnë përdorim të produkteve të padeklaruara në vitin 2025, krahasuar me 6% në vitin 2019.

Studimi vlerëson gjithashtu se niveli i kufizuar i tregtisë së paligjshme të cigareve të prodhuara tregon se rritja e akcizës nuk është shoqëruar me një zgjerim të konsiderueshëm të këtij tregu. Ndërkohë, Shqipëria vijon të ketë nivele relativisht të ulëta të akcizës së duhanit krahasuar me shumë vende europiane, çka lë hapësirë për politika të mëtejshme fiskale.

Në këtë kuadër, gjetjet e studimit ofrojnë një bazë të rëndësishme për hartimin e politikave të integruara, ku kontrolli dhe monitorimi i tregut informal, forcimi i gjurmueshmërisë dhe përmbushja e detyrimeve fiskale ecin paralelisht me politikat e shëndetit publik.

Studimi nënvizon rëndësinë e bashkëpunimit ndërinstitucional për parandalimin e tregtisë së paligjshme, rritjen e përputhshmërisë fiskale dhe forcimin e mbikëqyrjes së tregut të produkteve të duhanit.

Burimi: Illicit Tobacco Market in Albania: Evidence and Policy Implications, 2026.