Drejtori i Përgjithshëm i Doganave në Takimin e Nivelit të Lartë mbi masat për eliminimin e tregtisë së paligjshme të produkteve të duhanit në Ballkanin Perëndimor  (Publikuar dt. 17/03/2025)

Drejtori i Përgjithshëm i Doganave, Genti Gazheli mori pjesë në Takimin e Nivelit të Lartë Ministror mbi masat për eliminimin e tregtisë së paligjshme të produkteve të duhanit në Ballkanin Perëndimor, i cili u mbajt në datën 13 Mars në Podgoricë. Në fokus të diskutimeve gjatë këtij takimi, ku i pranishëm ishte dhe ministri i Financave i Shqipërisë, Petrit Malaj, si dhe drejtori i Përgjithshëm i Tatimeve, Ilir Binaj, ishte lufta kundër tregtisë së paligjshme të produkteve të duhanit në vendet e Ballkanit Perëndimor përmes masave të efektshme të kontrollit në pikat e kalimit kufitar dhe jo vetëm, ku autoritetet doganore kanë një rol të rëndësishëm krah institucioneve të tjera ligjzbatuese dhe partnerëve ndërkombëtarë.

Shqipëria ka bërë hapa të rëndësishëm në forcimin e sistemit të akcizës, për afrimin me kërkesat europiane dhe përmirësimin e masave për të luftuar aktivitetet e paligjshme në tregun e duhanit, përmes një qasjeje të integruar ndërinstitucionale, që përfshin administratën tatimore, doganat, institucionet e shëndetit publik dhe forcat e Policisë së Shtetit duke krijuar një mjedis të ekulibruar dhe që garanton stabilitet tregtar të ndershëm dhe të sigurt.

Gjithashtu, me miratimin e Strategjisë Afatmesme të të Ardhurave dhe Planit të Veprimit 2024–2027 si dhe sipas Programit të Reformave Ekonomike (ERP) 2025–2027, qeveria shqiptare ka planifikuar masa për rritjen graduale të akcizës mbi produktet e duhanit dhe nënprodukteve të tij, kjo me qëllim përafrimin me nivelet, sipas Direktivës së BE-së 2011/64.

Politikat e harmonizuara dhe kontrollet e përbashkëta me institucione brenda vendit, por edhe me partnerët ndërkombëtarë, kanë treguar se një qasje e koordinuar rajonale mund të ndihmojë në reduktimin e informalitetit dhe përmirësimin e të ardhurave fiskale. Gjatë takimit u dakordësua se bashkëpunimi mes vendeve të Ballkanit është i rëndësishëm për të forcuar kapacitetet e mbikëqyrjes dhe për të siguruar një treg më transparent.